O experimento de Miller e Urey representa a primeira comprobación de que se poden formar espontaneamente moléculas orgánicas a partir de substancias inorgánicas simples en condicións ambientais adecuadas. Foi levado a cabo en 1952 por Stanley Miller e Harold Clayton Urey na Universidade de Chicago. O experimento foi clave para apoiar a teoría do caldo primordial na orixe da vida.

Segundo este experimento a síntese de compostos orgánicos, como os aminoácidos, debeu ser doada na Terra primitiva. Outros investigadores -seguindo este procedemento e variando o tipo e as cantidades das substancias que reaccionan- produciron algúns compoñentes simples dos ácidos nucleicos e ata ATP.