O 30 de decembro a Unión Internacional de Química Aplicada e Pura (IUPAC), un organismo formado por representantes das sociedades nacionais de química de todo o mundo, anunciou o descubrimento de catro elementos químicos que completan a sétima fila da táboa periódica.
«Como organización global encargada de achegar pericia científica e obxectividade, así como de desenvolver as ferramentas básicas para aplicar e comunicar o coñecemento químico en beneficio da humanidade, a IUPAC se enorgullee de facer este anuncio en relación cos elementos 113, 115, 117 e 118, e a terminación da sétima fila da táboa periódica dos elementos», dixo con solemnidade o presidente da organización, Mark C. Cesa.
Despois de anos de traballo en laboratorios da máis alta tecnoloxía, nos que mesmo se recorreu a aceleradores de partículas, a organización recoñecía así o duro esforzo de varios equipos de investigadores de Xapón, Alemaña e Estados Unidos. Toda esta dedicación deu o seu froito en forma de catro elementos que aínda non teñen nome e aos que se coñece como elementos 113, 115, 117 e 118, (en función do seu número atómico, unha magnitude que indica a cantidade de protones que hai no seu núcleo).
Mentres os descubridores deciden que nome poñerlle e tratan de estudar as súas propiedades, estas investigacións poderían permitir entender un pouco mellor como funciona o interior dos átomos, e isto podería ter unha infinidade de aplicacións. Ademais, facilitarán que máis adiante se produzan novos elementos máis pesados, cun maior número de protones nos núcleos, como o 119 ou o 120.
No hay comentarios:
Publicar un comentario