O enigma dos números primos, a punto de resolverse

É un dos problemas matemáticos máis antigos do mundo. O grego Euclides (325-265 anos a.C) foi o primeiro en mencionar a existencia dos números primos, só divisibles por si mesmos e por un (2, 3, 5, 7, 11...). Considéranse infinitos, pero a medida que crecen, a distancia que os separa é cada vez maior e polo tanto máis complicado dar con eles. Por se fose pouco, entre este grupo xa raro por si mesmo, existe outro aínda máis peculiar se cabe, o dos primos xemelgos: pares de números primos separados por dúas unidades (por exemplo, 3 e 5, 11 e 13, 41 e 43...). Tamén se supón que son infinitos, pero se trata dunha conxectura, ninguén puido confirmalo ata a data. Quizais o momento estea preto.


Un mozo matemático de tan só 26 anos é, ata agora, o que máis se achegou á resolución da «conxectura dos primos xemelgos», un problema no que os científicos xa traballan en comunidade.

Os números primos non só son unha rareza ou un xogo para matemáticos, teñen unha grande utilidade na vida diaria. Utilízanse no campo da criptografía para garantir a seguridade e a protección de datos. Por exemplo, a banca online baséase nos números primos, que están detrás de cada compra protexida en internet. Ademais, coñecer mellor os números primos permitirá resolver problemas complexos noutras disciplinas, como a enxeñaría e a química.