Non hai dúas persoas que saquen as mesmas conclusións ao ler un mesmo libro. Aínda que as palabras sexan obxectivamente as mesmas, cada unha interpreta esas frases de acordo cos seus recordos e a súa forma de pensar. Pois cos xenes pasa algo parecido. E é que, aínda que case todas as células dunha persoa compartan as mesmas instrucións xenéticas, hai unha enorme variedade de tipos celulares (dende as células musculares ás células do fígado) que se diferencian precisamente no modo de ler as secuencias dos xenes.
Este martes, un grupo de investigadores da Universidade de Cambridge deu un paso máis na comprensión deste proceso, ao ter descrito con exactitude como nun momento dado algunhas células do embrión se resetean e perden as súas marcas epixenéticas. O estudo, publicado na revista «Cell», describe como se reprograman as células xerminais primordiais do embrión, que son aquelas que en adulto permitirán xerar espermatozoides e óvulos, e ademais suxire que algunhas zonas do ADN non se resetean para evitar que algunhas secuencias danen ao organismo e produzan enfermidades.
Neste sentido, os investigadores cren que as células xerminais primordiais (as que logo orixinan os gametos nos adultos) son reprogramadas entre as semanas dous e nove do desenvolvemento embrionario. Segundo describiron, durante ese proceso unha rede de xenes actúa para resetear os patróns de metilación do ADN. Isto é importante, porque permite entender como funciona un proceso crucial na regulación dos xenes e polo tanto no funcionamento das células.
No hay comentarios:
Publicar un comentario